Gratulaziuns als giubilars Medelins 2019
Gratulaziuns als giubilars Medelins 2019
Las giubilaras ed ils giubilars
Davon da seniester: Josefina Derungs-Deflorin, Zita Flepp, Giuseppa Lutz-Camenisch e Felix Venzin
Davos da seniester: Johanna Hosang-Giger, Eduard Lutz-Manetsch, Rosa Bundi-Hölzl e Culastia Flepp-Venzin
L'emprema dumengia el meins matg, d'aura plitost brutta, ein las giubilaras e giubilars che festiveschan il 2019 in anniversari rodund, vegni envidai per festivar e schar puppergnar a lur festivitad. Tochen igl onn 2017 veva la Societad da musica envidau mintgamai ad in inscunter pils giubilars da 75 onns e mintga 5 onns ensi. Cunquei che la Societad da musica ei vegnida sligiada si igl onn vargau hai dau neginas festivitads igl onn 2018. Uonn han denton l'Uniun da dunnas ensemen cul Chor mischedau surpriu l'organisaziun da quella fiasta. Gie, ei muncava enzatgei cu quella fiasta ei buca vegnida presentada avon in onn. Ils organisaturs han pinau tier ina sala festiva en scola a Curaglia. Buca tuttas giubilaras e giubilars ein stai presents. Per quels ch'ein denton stai en sala eis ei stau in bi e commuentont inscunter. Els tuts ch'ein aunc oz en nossa pintga vischnaunca persunalitats singularas ed appreziadas. Entgins d'els ein secasai en casa da tgira ed en vitgs vischinonts. Mo els ein e restan Medelins cun tgierp ed olma e quei per l’entira veta. Quei inscunter e quell'occasiun duei esser in engraziament per tut quei ch'els han prestau per nossa pintga cumminonza Medelina.
Il president dil Chor mischedau Arthur Venzin beneventa cordialmein las giubilaras ed ils giubilars che han dau suatientscha agl invit ed ein serendi en casa da scola a Curaglia per assister alla fiasta. Silsuenter repassan entginas persunas cun in stretg contact tiels giubilars cuortamein entgins tiarms ord la veta dils envidai. Denteren conta
il Chor mischedau bialas canzuns pils giubilars e dat aschia alla fiasta ina tempra tut speciala. Ina buna cuntinuaziun suenter las fiastas cun la musica dils davos onns.
Alla fin survegn mintga giubilara e giubilar in bien glas mèl d’aviuls ord la val Medel sco pign present. Ina biala fiasta per nossas vischinas e vischins ei gartegiada.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.