La tuor "Chischlatsch", per tudestg Castelberg, cun ina mesira da 9,00 meters ladezia, ca. 15 meters altezia e mirs da 1meter ed 80 centimeters grossezia stat suenter ca. 760 onns, cun sias quater alzadas, aunc oz loschamein sut la vischnaunca da Luven. Il crest sesanfla dadens Glion sur la via da Val Sogn Pieder. La Tuor ed era las aclas el contuorn saudan allas famiglias von Castelberg, da Mustèr, e sesents a Turitg. Cun la midada dil 15 tiel 16avel tschentaner ei la famiglia von Castelberg sespartgida. Ina part resta a Glion, pli tard Castrisch e Peiden, l'autra serenda a Mustèr.

Da cuort ei la cruna dalla tuor, sin atgna iniziativa dils possesurs, vegnida sanada. Quei per evitar che crappa crodi buca dalla miraglia. Aschia resta la tuor aunc dabia tschentaners. Sinaquei ch'igl uaul da feglia ha priu surmaun dil crest ei la tuor el temps da stad strusch veseivla. Donn, pertgei la tuor Chischlatsch cun aunc dabia restonzas dils mirs e baghetgs dasperas ei ina dallas inposantas tuors da quei temps en Surselva.

Cant: Chor viril Lumnezia, canzun Mia Valerusa, t: Roman Weishaupt, m: Gion Antoni Derungs.