Sia vita para ina paraula. La bella Norina crescha si a Firenze sco figlia dal pastizier Luigi Gilli da Samedan. Ella daventa actura, lavura cun Max Reinhardt a Berlin, è ina da las emprimas divas dal film mit ed è enconuschenta sin l’entir mund sut il num Maria Carmi.

Ella viva ina vita da jetset, enconuscha tut las grondas persunalitads dal mund cultural e vegn ludada sco actura d’ina preschientscha unica e sco ina da las pli bellas dunnas da l’Europa. Ma quai na tanscha betg ad ella: ella vul daventar princessa, marida il prinzi da la Georgia Matchabelli e va sco princessa Norina Matchabelli a New York.

Ma lura arriva in auter um en la vita da la princessa: in bel Ind carismatic , il Guru Meher Baba, che di ch’el saja Dieu en furma umana. El è a la tschertga da dunnas ritgas, avertas per la spiritualitad. E Norina era pli che averta. Ella banduna il prinzi, il luxus, e va cun il guru en l’India, sa suttametta cumplettamain e viva il rest da sia vita en sontga povradad.