Dumengia ils 9 da schaner festivein nus Buania. Igl ei freid. Gie, igl ei ualti criu cu las sis reginas contan lur melodiusas canzuns avon la caplutta da Sogn Roc a Pardé. Ei ha num tener la dira. Pertgei las reginas presentan buca mo ina ni duas canzuns, na, ellas contan sis canzuns cun lur vuschs finas e sonoras. Perfin en duas vuschs da quella ferdaglia, cumpliment.

La pandemia da Covid ha danovamein mess sil tgau l’organisaziun dil cantar da Buania. Cunquei ch’igl ei buca lubiu d’entrar en las casadas, ha la scolasta Evelina Giger giu l’idea da visitar mintga uclaun e sepresentar avon las capluttas dils vitgs. A Pardé ein ina roschada habitonts serimnai. Perfin da quels che han aunc mai viu la caplutta da Sogn Roc endadens. Ina biala e digna sentupada en nos vitgs nua ins entaupa pil pli mo gaglinas (era lezzas mieran o plaun e plaun) e vesa mo streglias vitas. Suenter il cantar dils retgs ha il team dall’Uniun da dunnas organisau in punsch cauld. A Pardé haveva la Gabriela Lutz preparau ina caulda surpresa e quei ha fatg bein allas reginas mo era als aspectaturs da quella temperaduras plitost freidas.

La tradiziun che Caspar, Melchior e Balthasar visetan nos vitgs enta Medel ei sin svanir. La situaziun dalla digren dils affons, che han purtau dapi decenis la nova dil Bambin, lai dubitar il mender. Perquei eis ei d’engraziar grondamein allas sis giuvnas ch’ein stadas promtas da delectar nus cun lur bellezia vuschs. Ei basegna tschaffen da cantar, ei basegna era tschaffen da sepresentar e lu aunc il trenament en gruppa. Pia in grond engaschi el temps liber ch’ellas han impundiu per quei usit. Jeu manegel che nos vischins ein intec scui sils Medelins, perquei che nossas reginas ein sepresentadas cheu aschi grondiusamein.

Per che aschia in eveniment sappi funcziunar e gartegiar drova ei entgins aunghels davostier. L’idea e l’inicianta igl onn 2022 dil cantar da Buania ei danovamein nossa anteriura scolasta Evelina stada. Ad ella schai quei semplamein a cor e quei che l’Evelina pren enta maun gartegia era. Davos las culissas ein denton era autras dunnas s’engaschadas, las quallas ei basegna era en quei liug da menziunar. L’adattaziun dils costums, lavar e mirar ch’ei seigien en in bien stan ha Matilda Venzin procurau. Il smincar ei stau la caussa da Valeria Gienal e Petra Pally. Ils transports ha la pleiv organisau e cheu ei Gabriel Venzin siglius en. L’organisaziun dil punsch e vin cauld suenter las presentaziuns ha il team dall’Uniun da dunnas priu enta maun. A Curaglia ein quei stadas, Gabriela Lutz, Jolanda Venzin, Anna Bundi e Maria Venzin-Marty.

Ina lavur d’idealists.

La collecta vegn danovamein surdada cumpleinamein alla Casa d’affons Urpi Wasi a Peru. La scola da Medel ha gia giu el vargau buns contacts cun quell’instituziun che basegna sustegn finanzial per procurar andantamein per la scolaziun e sustetgn dils affons ch’ein en fetg grondas miserias e quella tradiziun vegn mantenida era sche la scola ei buca pli a Medel.

Avonmiezdi ein las reginas sepresentadas en baselgia Sontgaclau a Curaglia e gidau a formar la messa ensemen cun sur Giusep Venzin. Leu eis ei percletg buca stau aschi freid. Ils presents han astgau guder las bialas canzuns ed igl ei stau in deletg pigl auditori. In grond Dieus paghi allas sis giuvnas per vies ordvart bi engaschi.

Entginas canzuns ha l’Evelina danovamein adattau sin romontsch. Ella ha schizun creau novs texts, cunquei ch’ina translaziun dil tudestg era buca propi enzatgei che cuntentava.

Nus essan ils sabis e viadi fagein.

La glisch splenduronta bugen suandein.

En stalla cattein gl’affon zun carin.

Cun stem’e respect salidein il bambin.

En gronda pupira ei Jesus naschius.

Per nus tuts spindrar cheu sil mund s’el vegnius.

Aunc oz en nies temps ei dat paupradad.

Perquei appellein a vies spért da buontad.

Pudeies uss arver vies cor e vos mauns.

Levgiar la miseria da bia concarstgauns.

Per vus implorein dil car sogn affon.

La benedicziun ed in bien niev onn.

Melodia dalla Baviera,

text e versiun romontscha, Evelina Giger