La tematica ei brisanta. La sala multifara en scoletta era emplenida mardis sera, ils 3 da fenadur. Las gasettas havevan gia puplicau plirs artechels sur ina eventuala pusseivladad, ch’ils da Medel „survegnan“ asilants. Aschia ei igl interess a quella informaziun era capeivels.

La Svizra registrescha dapi igl onn 2007 adina dapli requirents d’asil. Il grond diember d’asilants ei d’attribuir al fatg, ch’ils pievels dallas tiaras arabas ein serebalzadas encunter lur dictaturs. Ins numna quellas revoluziuns „la primavera araba“. Entschiet ha tut il dezember 2010 a Tunesia. Silsuenter ein quellas revoluziuns serasadas ora sco in fiug en las tiaras dall’Africa dil nord. Aunc oz savein nus persequitar en las medias bunamein mintgadi las demonstraziuns dils pievels e las reacziuns dallas armadas, in bien exempel ei la Syria.

In fatg ei, che la Svizra vegn bunamein inundada cun requirents d’asil. Ils pli bia fugitivs vegnan dallas tiaras Eritrea, Tunesia e Nigeria. Il zercladur ein 2526 persunas s’annunziadas e dumandau per asil. Quei sforza la Svizra d’encurir empau dapertut alloschaments per saver metter sut tetg per in cuort temps tontas persunas.

Peter Binz beneventa a Curaglia las suandontas persunas: Cusseglier guvernativ dr. Christian Rathgeb, digl Uffeci federal da migraziun signur Urs von Däniken e divisiunari e cumandant dalla regiun territoriala 3, signur Marco Cantieni. Plinavon eran aunc entgins representants dil cantun e dalla polizia cantunala e dil BFM presents. Las persunas da Berna ein sgulai a Curaglia cun dus helicopters dall’armada. Cuort informescha nies president communal la successiun dallas informaziuns las davosas jamnas. Entschatta zercladur ha Cusseglier guvernativ Christian Rathgeb informau il president communal sur la damonda dall’armada per endrizzar las localitads sil Lucmagn sco center dalla Confederaziun per asilants. Miez zercladur gia l’emprema uatga sil Lucmagn cun representants dil militar e dalla confederaziun ed era en preschientscha da Christian Rathgeb. Ils 19 da zercladur ei la suprastonza communala seradunada cul president dalla cumissiun da quen e gestiun e divisiunari Marco Cantieni per endriescher la situaziun.

La populaziun seigi adina vegnida informada transparentamein. Questa discussiun ed informaziun duei gidar la suprastonza communala a prender ina decisiun, la quala vegni prida ils 12 da fenadur.

Christian Rathgeb dalla regenza cantunala constatescha, ch’ei setracti d’ina cunvegna dalla confederaziun cun la vischnaunca. Seccapescha chil cantun Grischun seigi era interessaus, denton vegni il cantun a far negin squetsch. Il Grischun seigi obligaus da dar suttetg a 2.7% dils requirents d’asil ed ils 100 requirents plazzai el stabiliment militar vegnien quintai tiel contingent grischun. Christian Rathgeb ha era garantiu il sustegn ed agid dil cantun.

Silsuenter presenta signur Urs von Däniken dil BFM la situaziun actuala sil camp d’asil e daco ch’ins seigi gest vegni sin las localitads sil pass dil Lucmagn. Ei setracti cheu mo per in alloschi d’urgenza. Il temps seigi fixaus a maximal 6 meins. Quei ei vegniu precisau pliras ga. Quei fatg ha da far pervia dalla lescha actuala pertuccont midada d’utilisaziun da localitads, quei ei stipulau en la lescha cantunala e federala.

Previu seigi il temps digl avrel 2013 tochen october 2013. Quei denton tut tenor l’aura. Tier nus sa igl unviern mintgaton esser pli liungs che mo 6 meins.

La vischnaunca stoppi far in contract cun la Confederaziun ed en tal sappi vegnir stipulau las cundiziuns. Per exempel ei previu da cumprar tutta rauba che vegn duvrada sil Lucmagn en fatschentas dalla vischnaunca. Era las renovaziuns ed adattaziuns dallas localitads sappien fatschentas indigenas exequir.

Divisiunari Marco Cantieni ha allura informau sur la funcziun dil militar. Las localitads stettien era suenter a disposiziun per la schuldada, pertgei il militar sappi actualmein buca desister da quellas.

Tuts representants stattan silsuenter a disposiziun per damondas. Ei quei atgnamein responsabel da schar habitar persunas en quellas localitads sin bunamein 2000 meters sur mar sil Lucmagn? Quei ei stau in’emprema damonda dil president communal. Tenor Urs von Däniken stoppien tuttas localitads corrispunder a normas internaziunalas e talas vegnien era controlladas. Dil reminent stoppi era la schuldada star en quellas localitads e leu negin che sedamondi sche quei ei supportabel. Ils requirents d’asil stoppien star ca. 3 tochen 5 jamnas sil Lucmagn, en quei temps seigi la procedura terminada ed ins sappi decider nua quellas persunas ston serender.

Panzieris e dubis ein segirafranc tier tuts presents avon maun. Ch’ei detti negins problems, sappi negin garantir, quei ei era vegniu accentuau da signur von Däniken. L’experientscha en auters loghens muossi denton, ch’ei setracti pil pli da problems da pintga muntada. Dil reminent sefermien quellas persunas buca si en nossa regiun cu els han liber. Ei seigi semussau ch’ils pli biars serendien ellas aglomeraziuns nua enconuschents e confamiliars ein. Quei seigi pil pli a Genevra ed a Turitg. Mintga requirent d’asil survegn per di ina summa da 3 francs. Pia 21 francs per jamna. Nus stueigen denton buca tertgar, che quels hagien negins daners. Ei seigi avunda requirents d’asil che possedien avunda daners per saver serender enzanua e cumprar uorden. Plinavon regalien las organisaziuns humanitaras era bigliets pil traffic puplic. Aschia che quellas persunas ein lu nuota restrinschidas el territori dil Lucmagn. Tuttas damondas e temas ein vegnidas rispundidas e pridas. Igl ei stau ina informaziun cun respect vicendeivel dalla populaziun viers ils ufficials federals e cantunals.

Tenor la nova lescha d’asil ch’ei actualmein vegnida tractada dil Cussegl naziunal e vegn ussa aunc surluvrada dil Cussegl dils stans, eis ei previu cun l’entschatta digl onn 2013, che la Confederaziun ha la pusseivladad da plazzar per 12 meins asilants senza il consentiment dallas vischnauncas e quei en alloschaments federals ( p. ex. dil militar ). Aschia savein nus aunc decider sez oz co nus lein sligiar quella situaziun.