La fotografia mossa egn digls amprems autos da posta, en "Car Alpin Saurer 1921" sen igl pass d'igl Gelgia. Igl amprem auto da posta an nossa val è passo igl matg 1920 e chegl anfignen igls Mulegns, la stad 1922 anfignen Beiva e la stad 1923 anfignen Son Murezza. Tge svilup tg'igl auto da posta o gia mossa la statistica digls viagiatours. Igl davos onn cun posta da tgavals èn nia transportos igl 1919 7157 passagiers ed igl amprem onn cun auto da posta igl 1920 18179. Igl anviern cursava igl auto da posta anfignen Beiva pir igl 1928 ed anfignen Son Murezza igl 1935.

Digl amprem viadi anfignen igls Mulegns rapporta igl "Freie Rätier" igl sequent: "Auf der ganzen Strecke ist die Strasse für den Autoverkehr durchaus geeignet, und nur eine Stelle oberhalb Tinzen, an der kleine Rutschungen stattgefunden hatten, gab Veranlassung zum Aussteigen. Beim Passieren der Stelle zeigte sich die Anpassungsfähigkeit des Autos an das Terrain in glänzender Weise."

Davent d'gls 30 settember 1979 partan las postas per Riom,Parsonz, Salouf, Mon e Stierva davent da Savognin e betg ple davent da Casti. Mon e Stierva on anavant communicaziun er cun Casti e Bernhard Brenn da Stierva vign tscharnia scu impressari d'autos da posta responsabel per chella lengia. Igl transport sen la lengia Savognin - Parsonz - Stierva resta ainten igls mangs digls frars Gruber anfignen igl davos matg 1981. Cò vignan Silvio Dedual, posttenent a Parsonz ed Angelo Demarmels, impresa da transport a Salouf eligias scu impressaris d'autos da posta responsabels per chella lengia ed igl bus da sport a Savognin. Els survignan dus autos novs MAGIRUS da 30 plazs. Gruber surpeglia ena part digls curs dalla lengia Beiva - Casti, per part anfignen Planeiras.

Igl 2002 von igls frars Gruber an pensiun ed igl pensum vign partia se tranter Angelo Demarmels e Bossi + Hemmi.