Il fotograf Flepp da Mustér ha fatg quella foto dalla part sut dil vitg da Laax zacu l'entschatta dils onns 1900.

Da vart seniastra la Casa leunga baghegiada 1609-1616 da Wolf de Montalta, podestat a Tirano.

Plinensi da vart dretga vesin nus ina casa cun in pign cultger, la Casa da scola da Laax ch'ei barschada il schaner 1945. La Gasetta Romontscha dils 18-1-1945 scriva: Barschament a Lags. Sonda vargada enten catschar dis ei nossa casa da scola, situada amiez il vitg, daventada in'unfrenda d'in incendi. Il fiug ei vegnius observaus pér lu, cura che quel fuva serasaus bravamein. Prontamein ei il corps de pompiers semess en acziun, mo il baghetg fuva buca de spindrar pli. Pervia de munconza d'aua ei la sprezza a motor de Glion vegnida alarmada. Arrivada empau de tard ha quella tonaton prestau excellenta lavur e sclaus tut il prighel per la vischinonza. Igl intern dil baghetg de scola ei ualti tut spindrau e segirau. Persuenter piteschan entginas uniuns in considerabel donn vid lur inventari, deponius els divers locals. Oz miran ils vischins de Lags cun dolur sin las ruinas de lur modesta casa de scola, che ha prestau a pliras generaziuns nunpreziabels survetschs. L'erecziun d'in baghetg niev de scola el temps presents ei in grev problem.