A Paulina Pally-Venzin sils 95

La Paulina dil Rudolf, aschia vegn ella aunc adina numnada da biars enta Medel, sa festivar in ault natalezi. Gie, ella ei aunc ina dallas paucas dall’annada 1927 ch’ein oz denter nus e la davosa dils DeMulins. Sch’ins viseta ella a Cumpadials en Casa sogn Giusep, schess ins buca ch’ella hagi gia percurriu aschi in liung viadi. Ina dunna fina cun ina biala colur en fatscha e cu jeu hai visitau ella, era ella perfin stada tiel coiffeur. Raquintau ha ella a mi bia fatgs da pli baul. Sia feglia Rosmarie stueva meinsvart gidar suenter, mo en tut priu ha ella aunc adina ina fetg buna memoria. Ils 25 da fevrer 1927 nescha la Paulina sco emprem affon dils DeMulins, da Maria Derungs (*1910 +1942) e Gion Martin Venzin (*1897 +1977) a Drual. Els ein stai 5 affons. La Paulina (*1927), il Gion Battesta (*1928 +2019), la Rosa Catrina (*1930 +2019), il Toni (*1936 +2019) ed igl Alfons (*1939 +2020).

Ella ha frequentau ils 8 onns da scola a Platta. Gia fetg baul vegn la giuvna famiglia confruntada cun ina greva frida. Sia mumma Maria ei morta avon che siu sisavel affon neschi. Ella havess bugen empriu da schnadrina, denton la mort da sia mumma ha disfatg quei giavisch. Suenter quella greva frida, cun mo 15 onns, hai giu num per la Paulina sco feglia veglia, da surprender las lavurs dalla mumma en ed ord casa. Ina situaziun pauc emperneivla. Ei era il temps dalla secund’uiara mundiala. Siu bab Gion Martin stueva serender bia en survetsch militar. Ils fargliuns giuvens mavan buca aunc a scola, aschia era ella savens a casa tut persula culs fargliuns. Ina biala lavur, sco quei ch’ella raquenta aunc oz, ei stada igl empalar ils bos cu ei haveva num d’arar. Ella sco giuvna mava ordavon amiez ils dus bos ed il bab vegneva suenter e menava il criec. Ils onns vargan e la Paulina sto serender ella bassa per emprender tudestg. Ella ei stada en plazza a Domat, a Turitg tier la Francisca Petschen ed a Schaffusa el tenercasa. Igl onn 1952 marida ella il giuven Rudolf Pally da Curaglia e quei il davos da november. Mias marveglias eran grondas ed aschia haiel era dumandau la Paulina co ella hagi insumma empriu d’enconuscher il Rudolf, co quei eri da quei temps? Il Rudolf eri ad alp en Cristallina e meinsvart vegneva el a Pardatsch ed ella eri leu si mises. Quei fuvien mintgamai spuretgas sentupadas mo tuttina bellezia. Aschia hagi ella empriu da carezzar siu futur spus. Vinavon haiel vuliu saver daco pomai ch’els seigien pér maridai il davos da november ella baselgia parochiala a Platta? Sia risposta; il Rudolf eri engaschaus ad alp ed il muvel a casa hagi buca lubiu da maridar avon. Quei seigi stau ina decisiun pragmatica ed ella hagi giu da dir pauc ni nuot. Quei fuss oz ualticarteivel intec auter. Oz havess la spusa mattei in auter meini pertuccont il termin per ina maridaglia. La famiglia crescha. In fegl e duas feglias portan bia legria ella giuvna famiglia. Mo era ina spiarsa ston ella e siu mariu prender encunter. Quei era da quels onns nuot extraordinari. Da Sogn Giusep, ils 19 da mars 1973, survegn siu car um Rudolf ina sanguinada dil tschurvi e miera en consequenza da quella ils 31 da mars el spital Cantunal a Cuera. Quella mort ha fatschentau grondamein la Paulina ed ils affons. Daco pomai o Segner, daco pomai ha quei stuiu schabegiar. Tuttina ha ella era vinavon giu ina ferma cardientscha e buca schau pender il tgau. Las finanza haveva ella gia dapi lur nozzas enta maun. Il Rudolf luvrava fetg, mo el sempatschava pauc dall’administraziun e dallas finanzas en casa. Quei fatg ha gidau ella suenter la mort da siu um grondamein. Silmeins en quella sparta ha ella buca giu miserias da cuntinuar siu viadi. Aschia ei la Paulina s’engaschada biars onns ella Landis & Gyr a Mustér e quei tochen sia pensiun. Ella mava mintgamai cul Carli Flepp da Fuorns anora ed anen. Oz ei la Paulina tatta e basatta da 6 niazzas ed in nevs e da 4 sutbeadias ed in sutbeadi. Igl onn 2020 eis ella sfurzada d’entrar en Casa da tgira sogn Giusep a Cumpadials. Siu conscolar ed amitg Martin Giger fuva era leu. Els dus han adina giu ina fetg amicabla relaziun e la Paulina gidava savens il bab en Casa sogn Giusep. Dieus paghi per tut quei che Ti has fatg preziada Paulina. Els dus eran omisdus dall’annada 1927. Avon ch’jeu sundel serendius ord combra ha ella aunc raquintau a mi ch’ella fagevi la megliera suppa da giutta lunsch entuorn. Quei po franc constar. Nossas mummas e tattas fagevan buontad tratgas ed ellas havevan in bien maun per ina cuschina sempla, mo tonatun fetg gustusa. Alla Paulina giavischein nus aunc entgins onns en buna sanadat corporala e spirtala. Sinseveser in’autra ga.

Ciprian Giger