Las reginas han danovamein visitau l'emprema sonda e dumengia suenter Daniev vischinas e vischins. En mintga casada han ellas fatg in paus e cantau ina bellezia canzun romontscha. Il text romonntsch ei da scolasta Evelina Giger e la melodia ei d'ina canzun tradiziunala dalla Bolivia.

Engraziel fetg allas giuvnas cun lur vuschs sonoras. Gia all'entschatta digl onn purteis vus il sulegl en stiva e perquei essan nus tuts engrazieivels.

Cheu suonda il text:

Vegnan treis retgs digl Orient,

suondan la glisch en Diu cartent,

suondan la glisch, il radi clar

per il bambin lu visitar.

Vegni uss tuts e selegrei,

en si'honur da cor cantei,

da cor cantei.

Or sin pastira ils pasturs,

vesan il tschiel plein tarlischurs,

van pei a pei tier il bambin,

per adurar gl'affon carin.

Lein era nus els suandar,

per leu en stalla Diu anflar.

Vegni uss tuts e selegrei,

en si'honur da cor cantei,

da cor cantei.