Varga 30 onns ha Josef Deflorin da Disentis / Mustér pertgirau las nuorsas da Pitasch sin nossa alp da nuorsas, l'alp Dadens e Cuolm Selvadi. La tegia entadem ils Cuolms Selvadis era la stad siu dacasa.

Aschia havein nus da Pitasch enconuschiu Josef Deflorin sco in bien e fideivel nurser. Era el in orginal, sia survetscheivladad stat a nus aunc ditg en buna memoria. Cheu in per anecdotas da Josef Deflorin: La primavera cura che Josef vegneva ord la plazza d'unviern, per surprender la muntanera nuorsas sin pastira da primavera, salidava el nus da Pitasch cun dar il maun e dir curteseivlamein " beinvegni", e quei avon che nus vegnevan da far ad el in "beinvegni Josef" ! Sin damonda co has giu igl unviern vargau tunava ei per regla adina tuttina: Il patrun ei staus endretg cun mei, denton la patruna ei stau ina stria sibla!

In onn suenter ch'il tschess haveva priu naven enzaconts tschuts roga el il cautegia da dumandar igl uffeci da catscha cantunal per la lubientscha da sittar quel. Buis e muniziun duess il cautegia metter per el a disposiziun. Cun ina buis hagi el negins problems dad ir entuorn.

"Ils perderts fan aschi da tup che perfin ils tups sefan en con perderts els ein"

Quei audel aunc oz en mias ureglias co Josef Deflorin clamava amiez ils raschienis dils umens che seredunavan la sera sil baun avon ustria per dar ina patarlada. Suenter la pensiun ha Josef viviu en differentas casas da vegls en Surselva. El selegrava dallas visetas ed ha, quei ch'ei enconuschent a mi, mai selemantau e sedustau per el exemplaricamein.