Las giubilaras ed ils giubilars

Enamiez da seniester: Paulina Pally-Venzin e Luzia Beeli-Lutz

Davos da seniester: Hilda e Vinzens Giger, Toni Lutz, Monica Bundi, Guido ed Anna Bundi, Claudia Bearth e Pauli Pally

Danovamein han ils giubilars che festiveschan uonn in anniversari rodund astgau guder in suentermiezdi da tempra tut speciala. Dumengia da Palmas, ils 9 d’avrel da fina bial’aura, ha la societad da musica envidau ad in inscunter pils giubilars da 75 onns e mintga 5 onns ensi. Quei ei in engraziament per tut prestau, ein els gie stai quella generaziun che ha gidau a menar la vischnaunca da Medel leu nua ella stat oz. Mintgina e mintgin da nos giubilars ha cun siu engaschi persunal tenor siu meglier saver e puder, seigi quei en famiglia ni per la communitad, gidau al prosperir d’ina cuminonza muntagnarda. Mintgin d’els ei staus ina ferma petga en vischnaunca e pleiv ed in grond sustegn per vitg e val. Alla societad da musica eis ei danovamein reussiu d'organisar in'ordvart biala fiasta pils seniors da Medel. Il davos han ils musicants offeriu caffe e tuorta avon ch'ils emprems envidai ein gia serendi encunter casa. A tuttas giubilaras e tuts giubilars admettel da cheu anora ina sincera gratulaziun e principalmein ina buna sanadad pils onns vegnents.