Gion Tenner da Mustér scriva: Jeu hai intercurretg la fotografia pli da rudien ed era giu contact cugl archiv cantunal che posseda biaras fotografias da Carl Lang. Carl Lang ha viviu a Cuera denter 1884 e 1911, pia tochen sia mort. Sia fatschenta ei lu vegnida surdada a ses dus fegls che han menau quella vinavon, all‘enscthatta sut il num dil bab. Cheutras eis ei pusseivel da datar il maletg sin ca. 1912-15. Vid il hotel penda la numera 11 ni 44. Quei muossa era che la fotografia sto esser fatga suenter 1908/10, avon deva ei negina segirada da baghetgs. Lu dat ei da vart dretga la streglia che meina giu la staziun culla tabla „Zum Bahnhof“. La staziun ei stada en funcziun pér 1912. Ensemen culla fotografa digl archiv cantunal vein nus contemplau il resti dallas persunas. Il resti ei pli vegls che usitau da quei temps. Quei ei denton normal ella periferia e tschontscha era per il stan social dils umens. La vegliadetgna dils umens ei denter 16 e ca. 60 onns, pia negins affons, denton era neginas persunas veglias. Consequentamein persunas ella vegliadetgna da lavur. Forsa ils luvrers che han baghegiau la viafier? 1912 ha ei dau ina fiasta: per ils signurs el Hotel Disentiserhof, per ils luvrers el Hotel Cruna. Ei denton ina supposiziun. Jeu hai cumparegliau las fatschas cun las fotografias da Felix Huonder, anflau neginas parallelas. Savess era esser in chor (Ligia Grischa), denton lu dess ei tgunsch era persunas pli veglias.